Gildissvið

Reglur þessar taka til meðferðar sjúkraskrárupplýsinga, sem eru í vörslu Per mentis slf. kt 6608130550, svo og heimildar til að veita aðgang og/eða afhenda slíkar upplýsingar. Undir aðgang og/eða afhendingu upplýsinga í skilningi þessara reglna getur fallið hvers kyns hagnýting sjúkraskrárupplýsinga, sem eru í vörslu stofnunar, t.d. vegna vísindarannsókna o.þ.h.

Með hugtakinu sjúkraskrárupplýsingar er átt við lýsingu eða túlkun í rituðu máli, myndir, þ.m.t. röntgenmyndir, línurit og mynd‐ og hljóðupptökur sem innihalda upplýsingar er varða heilsufar sjúklings og meðferð hans hjá heilbrigðisstarfsmanni eða heilbrigðisstofnun og aðrar nauðsynlegar persónuupplýsingar (3. grein laga nr. 55/2009).

Með hugtakinu heilbrigðisstarfsmaður í reglum þessum er átt við starfsmann Per mentis slf., eða þjónustuaðila/verktaka í þjónustu Per mentis slf.

Ábyrgð fyrirtækisins

Per mentis slf. ber ábyrgð á meðferð sjúkraskráa og afhendingu sjúkraskrárupplýsinga, sem eru í vörslu fyrirtækisins. Ákvörðun um hagnýtingu slíkra upplýsinga verður einungis tekin af þeim sem stjórnendur fyrirtækisins hafa sérstaklega falið slíkt ákvörðunarvald.

Skyldur heilbrigðisstarfsmanns

Heilbrigðisstarfsmaður skal gæta ákvæða laga og reglugerða, eins og þau eru á hverjum tíma, við færslu, skráningu, varðveislu svo og meðferð upplýsinga úr sjúkraskrám og afhendingu þeirra. Heilbrigðisstarfsmaður skal gæta fyllstu varúðar við meðferð sjúkraskrárupplýsinga og ber að hafa í huga að þær hafa að geyma viðkvæmar persónuupplýsingar sem eru trúnaðarmál. Sjá 4. og 14. grein laga nr. 55/2009.

Framkvæmdastjóri

Framkvæmdastjóri fyrirtækisins er yfirlæknir og framkvæmdastjóri lækninga Per mentis slf. og ber ábyrgð á læknisfræðilegum efnum í samræmi við fyrirmæli laga og reglna. Á grundvelli stjórnskipulags, starfslýsingar og fyrirmæla reglugerðar, hefur framkvæmdastjóra verið falin umsjón og ábyrgð á vörslu sjúkraskráa og heilsufarsupplýsinga sem vistaðar eru innan Per mentis slf.

Framkvæmdastjóri tekur endanlega ákvörðun um að veita heimild til aðgangs að sjúkraskrám og/eða afhendingu sjúkraskrárupplýsinga, þ.m.t. vegna vísindarannsókna. Framkvæmdastjóri getur framselt heimild til að veita aðgang að sjúkraskrám og/eða afhenda heilsufarsupplýsingar, enda sé það gert skriflega.

Ef spurningar vakna skal leitað með þær til framkvæmdastjóra. Skylt er heilbrigðisstarfsmanni að leita upplýsinga og leiðbeininga um öll þau atriði sem óvissa eða ágreiningur kann að ríkja um.

Aðalmeðferðaraðili

Aðalmeðferðaraðili sjúklings ber ábyrgð á vörslu og meðferð sjúkraskráa og heilsufarsupplýsinga meðan sjúklingur er til meðferðar. Um ábyrgð á meðferð sjúkraskráa og heilsufarsupplýsinga sjúklinga, frá því tímamarki sem meðferð lýkur, fer samkvæmt fyrirmælum 4. gr.

Heimildir til aðgangs og afhendingar

Heilbrigðisstarfsmanni er óheimilt að veita aðgang að sjúkraskrá eða afhenda heilsufarsupplýsingar nema fyrir liggi heimild framkvæmdastjóra. Einnig er heilbrigðisstarfsmanni óheimilt, nema fyrir liggi skrifleg heimild framkvæmdastjóra, að veita aðgang að sjúkraskrá eða afhenda heilsufarsupplýsingar í tengslum við vísindarannsóknir, enda sé það í hana skráð.

Í hvert sinn sem sjúkraskrá er afrituð skal það í hana skráð.

Óheimilt er að nota faxtæki (símbréf) til sendinga á sjúkraskrárgögnum eða öðrum viðkvæmum gögnum, nema í sérstökum undantekningatilvikum, enda sé þá þannig frá málinu gengið að upplýsingar komist ekki í hendur óviðkomandi aðila. Ekki er þó gerð athugasemd við að tölulegar rannsóknarniðurstöður, hjartalínurit og aðrar slíkar upplýsingar sem læknar einir geta túlkað, séu sendar í símbréfi, ef af því telst veruleg hagræðing (sbr. dreifibréf Landlæknis nr. 9/96).

Ekki er leyfilegt að senda afrit af sjúkraskrám með tölvupósti.

A.ö.l. vísast í verklýsingu Per mentis slf. um afhendingu sjúkraskrárupplýsinga.

Gjald

Per mentis slf. er heimilt að innheimta gjald í tímavinnu sem nemur kostnaði vegna afhendingar og/eða aðgangs upplýsinga.

Tilvísun og ábyrgð

Tilvísun: Lög um sjúkraskrá nr. 55/2009

Ábyrgðarmaður skjals: Kristófer Sigurðsson, framkvæmdastjóri Per mentis slf. Gefið út 26. júlí 2023

Samþykkt á fundi stjórnar Per mentis slf. (þá Kristófer slf.) 26. júlí 2023

Uppfært með nýju nafni fyrirtækisins, yfirfarið og samþykkt á fundi stjórnar Per mentis slf. 6. apríl 2024.