Verkaskipting

Frá og með fyrsta viðtali við skjólstæðing til og með útskriftarviðtali (og læknabréfi til heilsugæslu) tökum við að okkur alla þjónustu við geðræn vandamál hans. Það þýðir alla greiningarvinnu, ákvarðanir um lyfjameðferð, lyfseðla, vottorð o.s.frv. Skjólstæðingar hafa afar greiðan aðgang að okkur og það er engin ástæða til þess að þeir leiti annað með þessa hluti. Að dreifa þjónustunni getur leitt til margvíslegra vandræða og því mikilvægt að hafa þessa hluti á einni hendi.

Við óskum því eftir því við aðra heilbrigðisstarfsmenn og stofnanir að þeir vísi á okkur ef skjólstæðingar okkar óska eftir lyfseðlum, vottorðum eða öðru tengdu geðrænum vandamálum.

Ef okkar skjólstæðingar leita annað brátt, t.d. á læknavakt eða bráðamóttöku geðsviðs, óskum við eftir því að aðeins sé gripið til bráðra aðgerða og síðan haft samband við okkur. Við getum langoftast boðið bráðaeftirfylgd innan fárra daga. Sama á við innlagnir, ef okkar skjólstæðingar leggjast inn förum við fram á að ekki séu gerðar meiriháttar breytingar á lyfjagjöf eða annarri meðferð án samráðs við okkur, eftirfylgd sé vísað á okkur og að við fáum læknabréf við útskrift.

Ef skjólstæðingur okkar velur að fara í aðra geðþjónustu, t.d. ef honum er vísað á ÞOK teymi LSH, geðheilsuteymi HH eða annað, viljum við gjarnan fá læknabréf um það.

Samskipti við aðra heilbrigðisstarfsmenn

Við leggjum mikla áherslu á góð samskipti við aðra heilbrigðisstarfsmenn. Hægt er að skilja eftir skilaboð hjá móttökuriturum í síma 583 3500 og við hringjum til baka svo fljótt sem auðið er, langoftast samdægurs. Einnig er hægt að senda tölvupóst á [email protected]. Við tökum við skilaboðum í Heilsugátt, en getum ekki lofað alveg sama svartíma þar.

Það er sjálfsagt að hafa samband við okkur ef spurningar vakna, sérstaklega um sameiginlega skjólstæðinga, eða ef þið viljið koma til okkar upplýsingum.

Hvað gerum við í lyndisröskunum

Við tökum að okkur greiningu og meðferð allra lyndisraskanna, þar á meðal flóknari meðferðir á borð við litíummeðferðir. Við rekum öfluga lithíummóttöku þar sem skjólstæðingar eru kallaðir inn á þriggja mánaða fresti í blóðprufur og fylgt eftir reglulega. Við veitum einnig meðferð með reglulegum geðrofslyfjum í forðasprautum í þeim tilfellum sem það á við.

Hvað gerum við í taugaþroskaröskunum

Við tökum að okkur fulla greiningu og meðferð á ADHD. Við tökum einnig að okkur endurmat á eldri greiningum og endurinnleiðingu á meðferð. Í slíkum tilfellum er ófrávíkjanlegt skilyrði að ADHD greining hafi verið sett af geðlækni, barna- og unglingageðlækni eða barnalækni sem sérþekkingu á ADHD. Ef verkefnastaða leyfir tökum við að okkur læknishluta ADHD greiningar þegar sálfræðihlutinn hefur verið unninn annars staðar. Við setjum þó það skilyrði að sálfræðimatið sé vel unnið, gert af sálfræðingi með sögu um góð vinnubrögð, ekki eldra en tveggja ára og að aðstæður í lífi skjólstæðingsins nú séu sambærilegar við aðstæðurnar þegar sálfræðimatið var unnið.

Við getum því miður ekki tekið að okkur greiningar á einhverfu. Við getum skimað, en ekki formlega greint. Við tökum hins vegar að okkur mál þar sem einhverfir einstaklingar hafa ama af færniskerðingu tengdri einhverfu, ef við teljum líklegt að við höfum eitthvað fram að færa. Mál eru metin hvert fyrir sig og það er ekki alltaf ófrávíkjanlegt skilyrði að formleg greining á einhverfu hafi verið gerð.

Þegar við metum þær greiningar sem á einhverfu sem liggja fyrir tökum við aðeins gildar greiningar sem settar hafa verið af geðlækni, barna- og unglingageðlækni eða barnalækni með sérþekkingu á taugaþroskaröskunum, helst í kjölfar greiningarferlis í teymi. Sálfræðimat er hjálplegt, ef það hefur verið gert, en önnur möt, t.d. frá einhverfuráðgjöfum, þroskaþjálfum, sérkennurum o.s.frv. eru ekki áreiðanleg ein og sér.